Бүгін Ақтөбеде суға шомылу маусымы басталды. Жаздың бірінші күні болғанымен, күн салқын, жағажайда адам жоқ. Бұл - Тұрғындар қалашығы ауданындағы жеке жағажай. Иесі өзіне тиесілі аумақты облыстық төтенше жағдайлар департаменті мамандарына тексертіп, жаз бойы халыққа қызмет етуге рұқсат алған. Қала бойынша бүгінге дейін 5 жағажай тексерілді. Елек өзенінің халық арасында "Земснаряд", "Бурляшка" аталып кеткен аумақтарында, Қарғалыға апаратын көпір астында суға түсуге қатаң тиым салынады. Бұл жерлерде шомылу өте қауіпті. Судың ағысы мықты, әрі түбінде шұңқырлары көп. Шомылуға болмайтын аумақтарда құтқарушылар бекеттері қойылған. Өткен аптадан бері мамандар тәулік бойы кезекшілікте жүр. Биыл облыс бойынша су жағаларында 71 құтқарушы қызмет етеді. Оларға арнайы оқытылған 90 ерікті көмектеседі. Ал, жағажайдағы қоғамдық тыныштықты атты полиция күзетеді. Суға шомылу маусымы бірінші қыркүйекке дейін созылады. Биылдың өзінде біздің облыста бір адам ажалын судан тапқан. 26-мамырда Елек өзенінің шомылуға тиым салынған аумағында 22 жастағы жігіт суға кетіп, қайтыс болды. Ол ішімдік ішкен. Өткен жылы Ақтөбеде 18 адам суға батқан. Алтауы бала.