Жаңа жыл отбасылық мереке. Әр шаңырақта тоқшылық болсын деп жылды мол дастархан басында қарсы алу дәстүр. Бұл күндері сауда орындарының жұмысы қызады. Ақтөбеліктердің сөзінше, мереке қарсаңында азық-түлік бағасы шарықтаған. Бұл нарықтағы жазылмаған заң. Тұтынушылар арасында көкөніс пен жеміс сұранысқа ие. Дегенмен олардың сапасы мәз болмай тұр. Әдетте жаңа жыл қарсаңында азық-түлік бағасы шарықтайды. Бұл нарықтағы жазылмаған заң. Ал тұрғындардың бұған еттері үйренген. Тек баға мен сапа сәйкес келсе, игі. Ақтөбеліктердің гипермаркет сөрелеріндегі көкөністің сапасына көңілдері толмайды. Бағасына сай емес, дейді. Бұған дейін де тұрақтандыру қорының картобына сын айтқандар болды. Келісі 84 теңгеден сатылып жатқан көкөніс өтпей тұр. Тұрғындар келісі 300 теңгеден басталатын картопты тұтынады. Бұдан бөлек қызанақ пен қиярдың келісі 1000 теңге шамасында, ал қызылша 187 теңге, пияз 91 теңгеден сатылып жатыр. Айта кету керек, мерекелік дастарханға тұрғындар кемі 50-60 000 теңге жаратады. Қымбатшылық алдымен ет, ұн, сүт өнімдеріне келген. Бүгінде күнбағыс майының литрі 700 теңге, күріштің бір келісі 215 теңге, қарақұмық 496 теңге, қант келісіне 310 теңге.