Төтенше жағдай кезінде жұмыссыз қалғандарға мемлекет тарапынан көрсетіліп жатқан 42500 теңге көлеміндегі әлеуметтік көмекті алу үшін арыз беруші ақтөбеліктердің саны артқан. Сәуір айының басынан бері 92 мыңнан аса азамат өтінім толтырған. Солардың 77 мыңға жуығы жәрдемақыларын алды. Сондай-ақ, атаулы әлеуметтік көмек алушыларға, 1,2,3 топтағы мүгедектерге, мүгедек баланың күтімімен үйде отырған ата-анаға республикалық бюджеттен қосымша 5567 теңге түседі. Аталған әлеуметтік төлемдерді алу үшін орталыққа келудің қажеті жоқ. Өтінімді беру үшін де "42500.еңбек.кз" сайты, телеграм-бот мессенджері, "Егов.кз" электронды үкімет порталы жұмыс жасап тұр. Онлайн түрде өтінішті жұмыс берушілер де, жеке адам да бере алады. Төтенше жағдай кезіндегі әлеуметтік төлемдерді жеке кәсіпкерлер мен қосымша сегіз санат бойынша тұрғындар алып жатыр. Осы төлем бойынша сұрақтары бар тұрғындар қалалық жұмыспен қамту орталығына хабарласа алады. Ал өтініш кері қайтарылған жағдайда әлеуметтік жәрдемақының неліктен тиесілі емес екендігі туралы азаматтарға өтінім берген сайттан немесе порталдан түсініктеме берілуі тиіс. Өтінішті толтыру кезінде қате жіберілсе, оны да ескертеді. Сондай-ақ, 1,2,3 топтағы мүгедектерге, қатерлі ісікке шалдыққандарға, аз қамтылған отбасыларына, жалғыз басты қарттардың есепшоттарына жергілікті бюджет қаражаты есебінен 20 мың теңге көлемінде жәрдемақы жіберілуде. Төтенше жағдай кезінде төленетін үшінші төлем- 5567 теңге. Бұл қаражат атаулы әлеуметтік көмек алушылар қатарындағы жанұялардың 6 жастан 18 жасқа дейінгі әр баласына төленеді. Аталмыш көмек 16 жасқа дейінгі мүгедек балаларға, халықты жұмыспен қамту орталығына тіркелген жұмыссыздарға тиесілі. Қазіргі дейін бес мыңға жуық отбасына бұл қаржы төленіп болған. Барлық төлемдер сәуір айының 20-на дейін аударылып болуы тиіс. Төтенше жағдай ұзартылған уақытта келесі айға қосымша өтінім жіберудің қажеті жоқ. Ал, аз қамтылған жанұяларға тиесілі азық-түлік қалтасы 2757 отбасына таратылған.