Қазақстандықтар АҚШ долларына деген тәуелділіктен арыла бастаған сыңайлы. Мереке күндері шетел валютасы құнының 400 теңгеге дейін шарықтауы қарапайым халық арасында ешқандай дүрбелең туғызбады. Ақтөбеліктер де қор биржасындағы қазіргі тұрақсыздыққа аса мән беріп жатқан жоқ. Қалада ақша айырбастау бекеттері де күнделікті тәртіппен жұмыс істеп жатыр. Екінші деңгейлі банктер мен ақша айырбастау бекеттері Әбілқайыр хан даңғылы бойында қаз қатар орналасқан. Бүгін түске дейін соның тек біреуі ғана жабық тұрды. Онда да АҚШ доллары мен теңге арасында тұрақсыздық болуы екіталай. Себебі қалғандары күнделікті тәртіппен жұмыс жасап жатыр. Олардың есігі алдында кезек те жоқ. Сапырылысып кіріп-шығып жатқан адам да байқалмады. Ақша айырбастау бекеттерінде доллар сатуды шектеп жатқан да ешкім жоқ. Бір-екеуіне кіріп, қарапайым қала тұрғыны кейпінде валютаның бар-жоғын сұрадық. Кассир бізге доллар бар, сатылып жатыр деп жауап берді. Қалған сауалдарымызды қызметтік құпия дегенді желеу етіп, жауапсыз қалдырды. Бүгін Ұлттық банк валюта нарығындағы жағдайды тұрақтандыру үшін валюталық интервенция жүргізген. «Тұңғыш рет «Қазақстан қор биржасы» АҚ валюталық саудасында франкфурт аукционы әдісі іске қосылды. Аталмыш құралды негізсіз құбылмалылықтың алдын алу үшін биржа Ұлттық банкпен бірге әзірлеген еді», - деп хабарлайды Қазақстан Ұлттық банкінен. Бүгін 1 АҚШ долларының құны 393 теңге 5 тиын болып бекіді. Өткен жұма күнгі әлемдік биржадағы сауда-саттықпен салыстырғанда доллардың теңгеге шаққандағы құны 11 теңге 49 тиынға немесе 3 пайызға қымбаттап тұр. Бұл "Қазақстан қор биржасының" мәліметі. Ал Ұлттық банк баспасөз қызметінің дерегінше, таңғы сессияда доллар-теңге сауда-саттығы 318, 5 миллион долларды құрады. Біздегі валюта айырбастау нүктелерінде түске дейін 1 АҚШ доллары 397 теңгеге сатылды. Ал сатып алу 391, кей жерде 393 теңгеден болды. Ақтөбеліктер қалыптасқан жағдайға еш алаңдаушылық білдіріп отырған жоқ. Жаһандық қорлар мен валюта нарықтарында жағдайдың мәз емесі белгілі. Әлемдік экономиканы СOVID-19 коронавирусының тарауы мен ОПЕК-ке мүше елдердің мұнай өндірісін қысқарту туралы келісімге келе алмауы есеңгіретіп тұр. Осыдан 4 күн бұрын мұнай бағасы барреліне 50 АҚШ долларынан 35 АҚШ долларына, яғни 30 пайызға дейін төмендеді. Ұлттық банк Қазақстанда жағдайдың тұрақсыздануына жол бермей, валюта нарығында жіті мониторинг жүргізіп отырғанын жеткізді. Біздің елдің сауда серіктестерінің жағдайы да бақылауда. Бүгін қор бирдасында рубль бойынша сауда-саттық жүргізілмеген. Қазір Ақтөбедегі нүктелерде 1 рубль 5 теңге 65 теңгеге сатылып жатыр. Сатып алу 5 теңге 30 тиын.