Ақтөбенің жолдарын түрік компаниялары салады. Қазір екі инвестормен келіссөздер жүргізілуде. Шетелдік қос компания келісетін болса жөндеу жұмыстары сәуір айының соңында басталады. Бұл туралы бүгін шаһар басшысы Мавр Абдуллин облыс әкімі Оңдасын Оразалинге баяндады. Облыс және қала әкімдері тілшілермен бірге автобусқа отырып, қаланың ойылып қалған жолдарымен жүріп көрді. Өңір басшысының айтуынша, бұл-бірінші кезекте тұрған мәселе. Әкімдер әлеуметтік желіде жазылған барлық сыннан құлақдар. Сол себепті биыл ойық-шұңқырды бітеу жұмыстарына 8 мердігер мекеме тартылып отыр. Дәл қазір қаланың 24 көшесінде жөндеу жұмыстары қарқынды жүріп жатыр. Алғашқы аялдаған аумақ - Әбілқайыр хан даңғылының "Нұр ғасыр" мешіті орналасқан бөлігі. Басты даңғыл былтырдан бері қатты ойылып, асфальт жабындысы әбден бүлінген. Қала басшысының түсіндіруінше, қалада барлық талапқа сай келетін көше жоқ. Дегенмен, жолдардың 80 пайызына асфальт төселген. 8-ші, 11-ші, Мәскеу, Шанхай, ескі қала, Сүт зауыты, Әуе қалашығы аудандарында да осы көрініс. Қаланың жолдары сын көтермейді. Тіпті қатты бүлінген Ағайынды Жұбановтар көшесі мен Некрасов, Жиенбаев көшелерінде жүретін жер қалмағандықтан көліктер қарсы жолаққа шығып жүруге мәжбүр. Тіпті жол инспекторларының көліктеріне дейін осылай жол ережелерін бұзып жүр. Әрбір ақтөбеліктің бас ауруына айналған жол мәселесімен тағы бір мәрте танысқан қала мен облыс басшылары бұл жағдайдың шешімін тапқан сыңайлы. Биылдан бастап жолдарды айнадай қылуға түрік инвесторлары ынталы боп отыр. Шетелдік компания әлемде қолданыла бастаған жаңа әдіс "қиыршық тасты жуып төсеу" тәсілімен жол салып береміз деп алдын ала жоспарын ұсынған. Биыл өңірде жол жөндеу жұмыстарына 5 млрд теңгеден аса қаржы жұмсалады. Оның 136 млн-ы сәуір айына дейін ойық-шұңқырларды бітеуге бөлініп қойған. Жаңадан 7 көшеге асфальт салынады. Облыс басшысы жол жөндеу жұмыстарын қатаң қадағалап отыруды қала әкіміне шегелеп тапсырды.