Ақтөбе адам танымастай өзгеріп кетіп жатса таң қалмаңыз. Жергілікті билік 150 жасқа толған шаһарымызды жасыл желекпен көмкеріп, кем-құтығының бәрін жамап, кеткен олқылықтарды түгел түзетіп, заманауи өзгерістер енгізіп, ажарына ажар қосып бермек. Бүгін қаланың сәулетіне енгізілетін өзгерістер бойынша қоғамдық тыңдау өтті. Міне, сіздің осындай сұлу қалада тұрғыңыз келе ме? Әрине, жоқ демессіз. Бояуы қанық, сәулеті анық. Көрер көз керек. "Ай десе аузы, күн десе көзі бар" дегендей, біздің Ақтөбе осындай сұлу болады. Қалалық жер қатынастары, архитектура және қала құрылысы бөлімінің басшысы Әлібек Серікбаев бәрін тап-тұйнақтай, А-дан Я-ға дейін жасайық деп едік, соған мүмкіндік беріңіздер деді. Бұл тек шенеуніктің емес, туған қаласына шын жаны ашыған нағыз азаматтың жанайқайы шығар деп қабылдадық. Ия қаладағы кей тұрғын үйлердің аулаларына бомба түскендей. Қоқыс пен балшық қосылғанда аяғыңды аттап басар жер таппайсың. Шенеуніктер осы бір келеңсіздікті ескерсе керек. Кіреберіске дейінгі аумақты тақтайдай етемін деп жатса неге жоқ дерсің. Шаң борамаса, қоқыстар төбеңде ұшпаса, аяғың бүлінбесе, айнала жарқырап тұрса, басқа не керек. Бүгінгі қоғамдық тыңдауға қатысқандар осылай ойласа керек, бәрі Серікбаев таныстырған жобаны ұйып тыңдады. Тек бір депутаттың компьютерде аямай бояп, бізге әдемі қылып әкеліп көрсеткеннен не пайда деген ескертуі ғана естіліп қалды. Сонымен жоба бойынша негізгі басымдық Батыс-2 ауданына беріліп отыр. Бұл жаңа аудандағы үйлер әртүрлі үлгіде салынып жатыр. Биіктіктері де әртүрлі. Сырттарын қаптаған силикат кірпіштің түстері де әртүрлі. Көзге әдемі көрінбейді. Жобалау кезінде мән берілмеген. Салынып, әбден мақтауы келіскен аудандағы бұл олқылықтарды шенеуніктер енді байқаған ба дерсің. Екінші кезекте Мәскеу ауданы. Бұл қаланың әкімшілік-іскерлік орталығына айналады. Қазір 1400 үй, 3,5 мың тұрғын бар. Енді 900 мың шаршы метр үй мен 300 мың шаршы метр әлеуметтік-коммерциялық нысан салынады. Жеке үйлер бұзылады. Басты мақсат - қаланың орталығындағы көлік нөпірін және тұрғындарға қызмет көрсететін нысандарды азайту. Ал 101-атқыштар бригадасы көшесін жаяулар көшесі қылу ұсынылып отыр. 2016 жылы қаланың бас жоспары жасалып, игерілген. Бірақ, жеке үй салуға жер беру үшін қыруар қаражат қажет болып отыр. мәселен қазір қалада жер кезегінде 146 мың адам тұр. Бәріне жер үлестіргенде 21 мың гектар жер керек болады. Бұл тағы бір қала салғанмен тең. Себебі Ақтөбенің өзінің аумағы 23 мың гектар.