Мемлекеттен қаржылай қолдау алған ақтөбелік кәсіпкерлер оны қалай жаратып жатыр? "Бизнестің жол картасы-2025", "Қарапайым заттар экономикасы", "Еңбек" шағын несиелендіру, Еуропалық қайта құру және даму банкінің қаржылай емес қолдауы секілді бағдарлама нәтижелерімен танысу үшін бүгін бірнеше нысанға пресс-тур ұйымдастырылды. Ерғазы Оспанов үлкен бизнеске жолды кәдімгі саудагерліктен бастағандардың бірі. Қазір қаладағы ең ірі автокөлік дөңгелегі орталығының құрылтайшысы. Мына ғимаратты кәсіпкер мемлекеттің қолдауымен тұрғызып алды. Елде бизнес саласын дамытуға бағытталған бірнеше мемлекеттік бағдарлама бар. Ерғазы Оспановтың жобасы "Бизнестің жол картасы" бағдарламасымен қаржыландырылған. Бұл бағдарлама бойынша екінші деңгейлі банк бизнесті кеңейтуге 13-17 пайыз өсімақымен несие беретін болса, мемлекет соның 50 пайызын субсидиялайды. Сондай-ақ, кәсіпкердің банкке қояр кепілі болмаса, мемлекет кепіл болады. Нысан тұрғызылатын жерге инфрақұрылым тартып беру де көмектің бірі. Сондай-ақ, қаржылай емес көмек бағдарламалары да бар. Мәселен, "Атамекен" кәсіпкерлер палатасы құқықтық кеңестер беріп, бизнес жүргізудің қыр-сырын үйретеді. Еуропалық қайта құру және даму банкі де белгілі бір сомаға грант бөліп, кәсіпкерлердің дамыған мемлекеттердің тәжірибесін үйренуіне жол ашады. Ерғазы Оспанов осы мүмкіндікті де пайдаланған. Бүгін өткен пресс-турдың мақсаты шағын және орта бизнес өкілдеріне мемлекеттік бағдарламалардың пайдасын көрсету. Өңірде 60 мыңның үстінде ірі-ұсақты кәсіпкер бар.