XXI ғасырдағы музей маманы қандай болуы тиіс? Бүгін қалада "Музей ісіндегі жаңа трендтер" тақырыбында екі күндік біліктілікті арттыру курсы басталды. Облыстық тарихи-өлкетану музейінде өтіп жатқан курста өңірдің 50-ден аса мұражай қызметкері Нұр-Сұлтан қаласынан арнайы келген мамандардан дәрістер тыңдайды. Ақтөбедегі музей экспонаттарының біраз бөлігі жаңғыртуды талап етеді. Қаладағы барлық мұражайларды қоса алғанда 4 млн-нан аса жәдігер ескі күйінде сақталған. Облыстық тарихи-өлкетану музейі жаңа ғимаратқа көшкенмен біраз қор жаңғыртудан өтпеген. Бұл туралы Нұр-Сұлтан қаласынан өңірдегі мұражай қызметкерлерін оқытуға арнайы келген маман Назгүл Нұржанқызы мәлімдеді. Білікті маман екі күн бойы әріптестеріне тарихи-мәдени мұраларды қорғау, заттарды сақтау, нормативтік-құқықтық актілерді қолдану жолдары тақырыбында сабақ өткізеді. Жергілікті мұражай қызметкерлеріне сондай-ақ, көрме жұмысы, қазір сәнге айналған музей ісіндегі жаңа трендтер, экскурсия жұмыстарын ұйымдастырудағы заманауи тәсілдер үйретілді. Тіпті мұражай бөлмелерінінің ылғалдылық температурасы, жарық берілуі, +18 бейнесі тақырыптары кеңінен талқыланды. Осы саланы кеңірек зерттеп жүрген елімізге белгілі музейтанушы Нұрсерік Жолбарыстың айтуынша, шетелде экскурсия кезінде түсіндіруші маманның көбірек жаттанды сөйлемеуіне мән беріледі. Сондықтан музей басшылығы мұндай экскурсия ұйымдастырар алдында көбірек мәлімет оқып алуды талап етеді. Екі күндік оқыту курсын өткізуге келген арнайы мамандар өңірдегі мұражай қызметкерлеріне сапалы экскурсиялар ұйымдастыру тәсілін де бөліспек.