Облыста осымен екінші адам коронавирус инфециясынан жазылып шықты. Облыстық жұқпалы аурулар ауруханасында 9 науқастың емі жалғасып жатыр. Бұл сан алдағы уақытта кеми түседі ме немесе керісінше өседі ме, оны уақыт көрсетеді. Өйткені осыдан екі апта бұрын Ақтөбеге еуропада білім алып жатқан 149 қазақстандық студент жеткізілген. Жастардан қайта-қайта сынама алынып жатыр. Сондай-ақ, алдағы уақытта облыстағы тәуекел топтар арасында жаппай шұғыл тест жүргізіледі. Ол үшін облыстық денсаулық сақтау басқармасы қытайдан 24 мың экспресс-тест алдыртып жатыр. Облыста коронавирус жұқтырғандар саны 11-ден 9 адамға қысқарды. Екеуі қауіпті дерттен құлан таза сауығып шыққан. Қалған 9 науқастың жетеуінің жағдайы қанағаттанарлық. Екеуінің жағдайы орташа ауырлықта. Дәрігерлер жазылып шыққан ақтөбеліктерді бақылауды тоқтатпайды. Олар үй карантинінде. Сондай-ақ, облыста науқастармен тікелей байланыста болған 270 тұрғын провизорлық, инфекциялық, карантиндік госпитальдарда. Соның 40-ы облыстық жұқпалы аурулар ауруханасында жатыр. Арасында осыдан екі күн бұрын Польшадан жеткізілген студенттер бар. Ақтөбеде қалған 116 студенттің жетеуі ғана ақтөбелік. Қалғандары өзге өңірлерден. 33 студент Шымкент қаласына жөнелтілген. Олардан Шымкентте коронавируске сынама алынған. Біреуі оң нәтиже көрсетті. Бортта оған жақын отырған жастар анықталған. Олар екі апта оқшауланып, бірнеше мәрте сынама алынып, денсаулықтары бақыланады. Егер теріс мәнді болса, үй карантиніне шығарылады. Қалада індетті анықтайтын екі зертхана жұмыс жасап жатыр. Біреуі ұлттық сараптама орталығы, екіншісі обаға қарсы станса базасында. Қосымша үшінші зертхана облыстық инфекциялық аурухана базасында ашылады. Сол уақытта күніне 400-ге жуық адамды тексеруге мүмкіндік туады. Сондай-ақ, үй карантиніндегілер жаппай тексеріледі. Ол үшін облыстық денсаулық сақтау басқармасы Қытайдан 24 мың дана эксперсс-тест алдыртып жатыр. Ол тәуекел топтарды да скринингтен өткізуге жетеді.